Müharibənin başa çatması üçün... | Zelenski Rusiya və Ukraynanın ərazi mübadiləsindən danışdı

Ukrayna Prezidenti Volodimir Zelenski müharibənin başa çatması üçün Rusiya ilə ərazi mübadiləsini istisna etməyib.

Bu barədə o, “The Guardian“a müsahibəsində danışıb.

Zelenski deyib ki, ABŞ Prezidenti Donald Tramp tərəfləri danışıqlar masasına gətirməyə nail olsa, ölkəsi Kurskun Ukrayna Ordusunun nəzarətindəki ərazilərinin mübadiləsini təklif edə bilər.

“Biz bir ərazini digəri ilə dəyişə bilərik. Hələ ki dəqiq bilmirəm. Bütün ərazilərimiz bizim üçün önəmlidir. Bunda hər hansı prioritet yoxdur”, – deyə Zelenski vurğulayıb.

O əlavə edib ki, Avropa Trampın Ukraynaya dəstəyi dayandırmasından yaranan boşluğu doldura bilməyəcək. “ABŞ-nin iştirakı olmadan verilən təhlükəsizlik zəmanəti gerçək deyil. Mən Avropanın ölkəmizin təhlükəsizliyinin əsas qarantı ola biləcəyi barədə fikirlər eşidirəm, lakin orada hər zaman buna “yox” cavabı verilir”, – deyə Ukrayna lideri söyləyib.

Zelenski eyni zamanda ABŞ-dən olan şirkətlərə ölkəsinin bərpası və investisiyalar üçün sərfəli müqavilələr təklif edəcəyini açıqlayıb.

Ukraynanın dövlət başçısı tərəfdaşların onlara nüvə silahı və raketlər verməli olduğuna diqqət çəkib.

“Bizi hər növ raketlərdən yalnız “Patriot” xilas edə bilər. Lakin hətta o belə təhlükəsizliyimizi yetərincə təmin edə bilməz. Ukraynaya kömək edənlər onu yerli iş adamları ilə birlikdə bərpa etmək imkanı qazanır. Bütün bu məsələlərin müzakirəsinə hazırıq. Nüvə silahımızı qaytarın, bizə raketlər verin və milyonlarla şəxsi heyətə malik ordumuza maliyyə məsələlərində dəstək olun. Xalqımızın sabitlik içərisində yaşaması üçün öz kontingentinizi ölkəmizin buna ən çox ehtiyacı olan ərazilərinə yerləşdirin”, – deyə Ukrayna lideri fikirini tamamlayıb.