Müharibənin taleyini dəyişəcək hücumlar | Rusiya və Ukrayna arasında zərbələr şiddətlənir - Baku TV

Rusiya Silahlı Qüvvələri Ukraynanın hərbi aerodromlarına, yanacaq-energetika və nəqliyyat infrastrukturu obyektlərinə, eləcə də logistik mərkəzlərə zərbələr endirib.

Rusiya Müdafiə Nazirliyinin yaydığı məlumatda qeyd edilib ki, məhv edilən obyektlər arasında PUA-ların və onlar üçün komponentlərin istehsal və saxlanma məntəqələri, həmçinin Ukrayna Silahlı Qüvvələrinin və xarici muzdluların müvəqqəti dislokasiya məntəqələri də yer alıb.

Nazirliyin məlumatına görə, Rusiya Ordusu Çerniqov vilayətindəki yaşayış məntəqəsində yerləşən qazpaylayıcı stansiyaya, eyni zamanda Sumı vilayətindəki 110 kV-luq elektrik yarımstansiyasına zərbə endirib. Bundan başqa, Silahlı Qüvvələr Çerniqov vilayətində yük daşıyan dəmir yolu qatarına zərbə endirib.

Ukrayna Ordusu da zərbələrə zərbələrlə cavab verib. Belə ki, iyulun 5-nə keçən gecə Ukrayna Müdafiə Qüvvələrinin bölmələri Krımdakı hərbi aerodroma zərbə endirib. Aerodrom Rusiya Ordusunun operativ-taktiki və hərbi dəniz aviasiyasının təyyarələrinin yerləşdirilməsi, döyüş uçuşlarının təmin edilməsi, logistika və aviasiya texnikasına texniki xidmət məqsədilə istifadə olunur.

Bununla yanaşı, Donetsk vilayətində yaşayış məntəqəsi yaxınlığında avtomobil körpülərinə də zərbələr endirib. Həmçinin ordu qüvvələri tərəfindən Donetsk və Xerson vilayətlərində yaşayış məntəqələri yaxınlığında yerləşən üç sursat anbarının vurulduğu bildirilib.

Ukrayna Silahlı Qüvvələrinin pilotsuz sistemlər üzrə komandanı Robert “Madyar” Brovdi isə “Facebook” hesabında yazıb ki, son 48 saat ərzində Krım ərazisində 16 enerji qovşağı sıradan çıxarılıb.