NATO-dan Kremlə xəbərdarlıq

Rusiyaya məxsus pilotsuz uçuş aparatlarının Danimarka və Norveçin hava məkanını pozması ilə bağlı xəbərlər yayılan vaxt NATO-nun Baş katibi Mark Rutte açıqlama verib.

Alyansın rəhbəri Estoniyada baş verən hadisənin fonunda Kremlə xəbərdarlıq ünvanlayıb ki, müttəfiq ölkələr müdafiə olunacaq:

“Müttəfiqlərimiz güclü həmrəylik göstərdi və Rusiyanın son addımlarını pislədilər. NATO bir daha təsdiq etdi ki, bizim kollektiv müdafiəyə dair ümumi öhdəliyimiz sarsılmaz bir reallıqdır. Biz Rusiya tərəfindən qəsdən və ya təsadüfən atılan bu addımların eskalasiyasını görmək niyyətində deyilik. Eyni zamanda biz müttəfiqlərin ərazilərini hər zaman müdafiə etməyə hazırıq. Biz hərbi ittifaqıq, lakin sadəlövh deyilik. Ona görə də nə baş verdiyini və bunun qəsdən olub-olmadığını açıq şəkildə görürük. Sözsüz ki, biz istənilən halda özümüzü müdafiə etməliyik”.

Qeyd edək ki, daha əvvəl Alyans Rusiyanın Estoniyanın hava məkanını pozmasından sonra Moskvaya xəbərdarlıq edib. Estoniya hökuməti Rusiyanın 3 “MiQ-31” qırıcısının 12 dəqiqə ərzində hava məkanını pozduğunu açıqlayıb. Hadisə Rusiyaya məxsus 20 dronun Polşa hava məkanına daxil olmasından cəmi bir həftə sonra baş verib.