NATO Ukraynaya dəstəyini davam etdirəcək

"NATO ölkələri Rusiyadan gələn real və daimi təhdidlərlə üzləşir".

Bunu NATO-nun Baş katibi Mark Rutte Brüsseldə alyans ölkələrinin xarici işlər nazirlərinin iclasının yekunlarına dair mətbuat konfransında bildirib.

Onun sözlərinə görə, Rusiya Ukraynanın mülki obyektlərinə və infrastrukturuna hücumlarını gücləndirir, alyans üzvlərinin hava məkanını pozur və kiberhücumlar həyata keçirir.

"Bu gün əsas diqqət müdafiəyə yatırılan sərmayələrə yönəldilib. Nazirlər Haaqada qəbul edilmiş öhdəliyi – hər il ÜDM-in 5 %-nin müdafiəyə cəlb olunması məsələsini müzakirə ediblər. Bu, kollektiv müdafiə üçün əsas vasitələrin, o cümlədən müasir HHM sistemlərinin hazırlanmasına və alınmasına imkan verəcək. Biz bir daha təsdiqlədik ki, Ukraynaya dəstək bu 5 %-lik hədəfə çatmaqda nəzərə alınır, çünki bu, birbaşa olaraq öz təhlükəsizliyimizə töhfə verir. Avropa müttəfiqləri və Kanada investisiyalarını əhəmiyyətli dərəcədə artırır – bu, müsbət haldır. Amma daha çox iş görməliyik", – deyə Baş katib bildirib.

Mark Rutte əlavə edib ki, NATO-ya üzv ölkələr, o cümlədən Kanada, Almaniya, Niderland, Norveç və Polşa PURL çərçivəsində Ukraynaya dəstək üçün əlavə vəsait ayırır.

O, sonda bütün ölkələri 2026-cı ilə qədər öhdəliklərinin icrasını sürətləndirməyə çağırıb.