NATO və Aİ Rusiyaya qarşı güclərini birləşdirir? - Putin Trampla görüşsə...

Ukraynadakı döyüşlərin dayandırılması ilə bağlı yaranan ümidlər sarsılıb. Bu, Rusiya Prezidenti Vladimir Putinin İstanbul görüşünə qatılmaması fonunda baş verib.

“Bloomberg”in yazdığına görə, hazırda bütün diqqət Rusiyaya qarşı sanksiyalara yönəlib. Çünki bu təzyiq metodu V.Putini danışıqlar masasında oturmağa məcbur edə bilər.

ABŞ dövlət katibi Marko Rubio isə bildirib ki, İstanbul danışıqlarının effektivliyi Donald Tramp ilə Vladimir Putinin görüşündən asılıdır. Çünki bu görüş baş tutmadan nəyəsə ümid etmək yersizdir.

Dialoqun baş tutmamasında isə avropalılar günahkar kimi V.Putini görürlər. Belə ki, onun İstanbula göndərdiyi nümayəndə heyəti yüksək səviyyəli deyildi. Ümumiyyətlə, NATO çərçivəsində görüşlər avropalılarla amerikalıları Ukrayna mövzusunda yaxınlaşdırıb. Hazırda Ukrayna ilə bağlı qərarlar qarşılıqlı razılaşmalar əsasında qəbul olunur.

Moskva isə daha çox ABŞ-nin atəşkəs təklifi ilə razıdır. Çünki bu atəşkəs Krımın rəsmən Rusiya ərazisi kimi tanınmasını da özündə ehtiva edir. Bu baxımdan 2022-ci ildən bəri dayandırılan NATO-Rusiya məsləhətləşmələrinin bərpası da gözlənilir.

Qərbdən olan analitiklərin fikrincə, savaşın hazırkı tempi də Rusiyaya sərf edir. Belə olan halda Moskva daha az itkilərlə daha çox əraziyə nəzarəti ələ keçirir. Bu əməliyyatlar sürətli aparılmasa da, savaşın gedişatı Rusiyanı qane edir.