Nazirlər Vaşinqtondan sonra Brüsseldə bir araya gələcəklər

NATO Baş katibi Mark Rutte Brüsseldə qurumun Baş Qərargahında Danimarkanın müdafiə naziri Troels Lund Poulsen və Qrenlandiyanın xarici işlər naziri Vivian Motzfeldtlə görüşəcək.

Bu barədə blokun mətbuat xidməti məlumat yayıb.

Rutte Qrenlandiyanın təhlükəsizliyinin gücləndirilməsi ilə bağlı NATO çərçivəsində bir sıra məsləhətləşmələr keçiriləcəyini elan edib.

Onun fikrincə, bu, ABŞ-ni inandırmalıdır ki, NATO Qrenlandiyanı yaxşı müdafiə edir və buna görə də onu ilhaq etməyə ehtiyac yoxdur, sadəcə alyansın ərazisi kimi istifadə etmək olar.

“ABŞ və Danimarkanın Qrenlandiya üzrə birgə İşçi Qrupunun iclasları hər iki-üç həftədən bir keçiriləcək”. Belə bir açıqlama ilə isə Ağ Evin mətbuat katibi Kerolayn Levitt çıxış edib.

Danimarka və Qrenlandiya xarici işlər nazirlərinin Vaşinqtonda ABŞ-nin vitse-prezidenti Cey Di Vens və ABŞ dövlət katibi Marko Rubio ilə görüşündən danışıb.

“Yaxşı görüş idi. Həmin görüşdə tərəflər Qrenlandiyanın alınması ilə bağlı texniki danışıqları davam etdirəcək şəxslərdən ibarət işçi qrupu yaratmaq barədə razılığa gəliblər. Mənə məlumat verilib ki, bu danışıqlar hər iki-üç həftədən bir keçiriləcək. Beləliklə, administrasiya danimarkalılar və Qrenlandiyadan olan nümayəndə heyəti ilə danışıqları davam etdirmək niyyətindədir.

Lakin Prezident öz prioritetlərini aydın şəkildə bildirib. O, ABŞ-nin Qrenlandiyanı almasını istəyir. Tramp, bunun bizim milli təhlükəsizlik maraqlarımıza uyğun olduğuna inanır”, – deyə Kerolayn Levitt sonda əlavə edib.