Netanyahu səhv etdi! | Baydendən İsrailə gözlənilməz reaksiya
ABŞ Prezidenti Cozef Bayden Qəzzadakı müharibəyə işarə edərək İsrailin Baş naziri Benyamin Netanyahunun münaqişəyə yanaşması ilə razılaşmadığını bildirib.
Ağ Ev rəhbəri rəsmi Təl-Əvivi döyüşləri dayandırmağa çağırıb.
“Düşünürəm ki, o, atdığı addımlarla səhvə yol verir. Onun münaqişəyə yanaşması ilə razılaşmıram. Mən İsraili atəşkəsə səsləyirəm, onları qarşıdan gələn bir neçə həftə ərzində ölkəyə daxil olan bütün ərzaq və dərmanlara tam çıxış imkanı verməyə çağırıram.
Mən Səudiyyə Ərəbistanından tutmuş, İordaniya və Misir rəsmiləri də daxil olmaqla hər kəslə sülhlə bağlı danışıqlar aparmışam. Adını çəkdiyim ölkələr hər şeyə hazırdır. Onlar humanitar yardımın göndərilməsi məsələsinə də razılıq veriblər. Düşünürəm ki, mülki şəxslərin tibbi və qida ehtiyaclarınının ödənilməməsi üçün heç bir səbəb yoxdur və ola da bilməz. Bunu dərhal həyata keçirmək lazımdır”, – o bildirib.