Netanyahudan atəşkəsə kəskin etiraz: Bu, terror qarşısında məğlubiyyətdir

İsrail quru qüvvələri Qəzzaya girərək HƏMAS-ın əsir götürdüyü daha bir əsgəri azad edib. Bu, Böyük Britaniya və digər müttəfiqlərin münaqişədə humanitar fasilə üçün davam edən çağırışları fonunda baş verib.

Çağırışlara baxmayaraq, Netanyahu hələ də atəşkəslə razılaşmır, “ola bilməz” deyir. “Atəşkəs çağırışları İsrailin HƏMAS-a təslim olması çağırışlarıdır. Belə olmayacaq”, – deyə Netanyahu bildirib.

Baş nazirin sözlərinə görə, HƏMAS və İrandakı terror qrupları ilə döyüşən İsrail dünya sivilizasiyasının düşmənləri ilə mübarizə aparır. İsrail atəşkəslə razılaşmayacaq, çünki bu, HƏMAS-la mübarizədə, terror qarşısında məğlubiyyət demək olardı.

Bu arada, BMT-nin Fələstinli Qaçqınlar üzrə Agentliyinin rəhbəri fövqəladə iclas zamanı İsraili fələstinliləri “kollektiv cəzalandırmaqda” və mülki əhalini məcburi köçkün etməkdə günahlandırıb. “Bu müharibə milyonlarla insanın ölüm-qalım məsələsinə çevrilib”, – deyə o əlavə edib.

Qeyd edək ki, Qəzzanın Səhiyyə Nazirliyi 8300-dən çox insanın həlak olduğunu, onların 66 faizinin qadın və uşaqlar olduğunu açıqlayıb. İsrail tərəfdə ölənlərin sayı isə 1400-ü keçib.