Nyu-Yorkda 25 il əvvəl baş vermiş dəhşət | Faciə nəticəsində 3000 nəfər həlak olub - Baku TV

2001-ci il sentyabrın 11-də ABŞ-də silsilə terror aktları törədilib. Həmin faciədən artıq 25 il ötür. Faciə nəticəsində təxminən üç min insan həlak olub.

Rəsmi məlumata əsasən, həmin gün səhər saatlarında "Boeing 767" tipli iki təyyarə Ümumdünya Ticarət Mərkəzinin 110 mərtəbəli qoşa binalarına, "Boeing 757" tipli üçüncü təyyarə Vaşinqtonda yerləşən ABŞ Müdafiə Nazirliyinin binasına çırpılıb. "Boeing 757" tipli dördüncü təyyarə isə Pitsburq şəhərindən 80 mil məsafədə yerə düşüb. Həmin təyyarələrin terrorçu-kamikadzelər tərəfindən qaçırıldığı bildirilib.

Terror aktı nəticəsində Nyu-York şəhərinə dəyən zərərin ümumi həcmi 36 milyard dollar təşkil edib. "Əkiz qüllələr"in dağıntılarının təmizlənməsi isə səkkiz aydan çox vaxt aparıb. Pentaqonun binasının dağılmış qərb hissəsi 2002-ci ilin sentyabr ayında bərpa olunub.

11 sentyabr terroru "Əl-Qaidə" lideri Usama bin Laden tərəfindən təşkil edilib.

Ümumilikdə, 11 sentyabr 2001-ci ildə ABŞ-nin müxtəlif bölgələrində törədilən terror aktları nəticəsində Nyu-York, Vaşinqton, Pensilvaniya və Şanksvil ətrafında 2977 nəfər öldürülüb.

İlkin hücumlar və qüllələrin dağılması zamanı həlak olanlardan 343 nəfəri Nyu-York şəhərinin yanğınsöndürənləri, 23 nəfəri Nyu-York şəhər polis işçiləri və 37 nəfəri liman zabitləri olub.