Öcalandan tərəfdarlarına təcili çağırış | Tarixi məsuliyyəti öz üzərimə götürürəm

PKK terror təşkilatının həbsdə olan lideri Abdullah Öcalan tərəfdarlarına çağırış edib.

O, dəstəkçilərindən silahı buraxmalarını xahiş edib.

“Bütün qruplar tərk-silah olunmalı və PKK ləğv edilməlidir. Mən silahı yerə qoymağa çağırıram. Bu çağırışa görə tarixi məsuliyyəti öz üzərimə götürürəm”, – deyə A.Öcalanın müraciətində qeyd edilib.

Onu da bildirək ki, DEM Partiyasının rəhbərliyi İmralı adasında PKK lideri ilə danışıqlar aparıb. Danışıqlar nəticəsində rəhbər şəxsin müraciətinin yayımlanması barəsində qərar verilib. Daha sonra İstanbulda təşkil olunan mətbuat konfransında A.Öcalanın müraciəti həm türk, həm də kürd dillərində oxunub.

Xatırladaq ki, PKK lideri Abdullah Öcalan 26 ildir İmralı həbsxanasında saxlanılır. O, 1999-cu ilin fevralında Milli Kəşfiyyat Təşkilatının əməliyyatı nəticəsində Keniyada saxlanılaraq Türkiyəyə gətirilib. A.Öcalan ölüm cəzasına məhkum edilsə də, daha sonra onun barəsində verilən hökm ömürlük həbs cəzası ilə əvəzlənib.