Ölkə liderləri Rəisinin həlak olması ilə bağlı nələr dedi?

İran Prezidenti İbrahim Rəisinin gözlənilməz ölümünə xarici ölkələrin və təşkilatların liderləri reaksiya veriblər.

Türkiyə Prezidenti Rəcəb Tayyib Ərdoğan iranlı həmkarının helikopter qəzasında həlak olmasına kədərləndiyini bildirib.

“İran Prezidenti, qardaşım İbrahim Rəisi və onun rəhbərlik etdiyi nümayəndə heyətinin helikopter qəzası keçirməsi bizi çox kədərləndirdi. Türkiyə Cümhuriyyəti olaraq hadisəni yaxından, İran hakimiyyəti ilə tam təmasda və koordinasiyada izlədiyimizi və lazım olan hər cür dəstəyi verməyə hazır olduğumuzu bildirmək istəyirəm”, – deyə R.T.Ərdoğan sosial media hesabında paylaşım edib.

Rusiya Prezidenti Vladimir Putin də İranın Ali Rəhbəri Ayətullah Seyid Əli Xameneiyə Prezident İbrahim Rəisinin həlak olması ilə bağlı başsağlığı verib. Kreml rəhbəri məktubunda vurğulayıb ki, o, Rusiyanın əsl dostu kimi ölkələrimiz arasında mehriban qonşuluq münasibətlərinin inkişafına əvəzsiz töhfələr verib, onların strateji tərəfdaşlıq səviyyəsinə çatdırılması üçün böyük səylər göstərib.

Pekindən də baş verən hadisəyə reaksiya gecikməyib. Çin Sədri Si Cinpin İran Prezidenti İbrahim Rəisinin ölümü ilə əlaqədar başsağlığı verib.

BƏƏ Prezidenti Şeyx Məhəmməd bin Zayed Əl Nəhyan da baş verən hadisəyə münasibət bildirib.

Paylaşımda deyilir: “Prezident İbrahim Rəisinin, xarici işlər naziri Hüseyn Əmir-Abdullahiyanın və onları müşayiət edənlərin faciəvi qəzadan sonra vəfatı ilə əlaqədar İran hökumətinə və xalqına dərin hüznlə başsağlığı verirəm. BƏƏ bu çətin zamanda İranla həmrəydir”.