Onlar sağ qalmağımız üçün bizə kömək etdilər | Zelenskidən Qərb açıqlaması

Ukrayna Prezidenti Volodimir Zelenski hesab edir ki, Qərb tərəfdaşlarının göstərdiyi hərbi və maliyyə yardımı müharibədən sağ çıxmaları üçün həlledici idi, lakin qələbə üçün kifayət deyil.

Birləşmiş Krallığın “Channel 4 News” telekanalına müsahibəsi zamanı Zelenski hələ də ətrafında baş verən siyasi nüanslara öyrəşmədiyini, hazırda Qərbin yardımının azaldılması təhlükəsi ilə üzləşdiklərini etiraf edib.

“Hamı gülümsəyir, məni qucaqlayır, deyirlər ki, sən qətiyyətlisən, güclüsən, azad lidersən, demokratiyanı xilas edirsən. Lakin Kiyevin rəhbəri mən olmasaydım, dünya Rusiyanın ABŞ-yə hücumu ilə üz-üzə qalardı”, – deyə Ukrayna Prezidenti bildirib.

O həmçinin nankor görünmək istəmədiyini, Qərbdəki tərəfdaşlarının Ukraynaya çox kömək etdiyini və bu dəstək olmasaydı, ölkəsinin ayaqda qala bilməyəcəyini də qeyd edib.

“Onlar sağ qalmağımız üçün bizə həqiqətən kömək etdilər. Lakin düşünürəm ki, qalib gəlməyimiz üçün bizə daha çox yardım edə bilərdilər. Bu, ölkəmizin ayaqda qalması üçün vacibdir, ona görə də emosional ola bilmirəm. Amma bəzən elə anlar olur ki, mən həqiqətən heç nəyi başa düşə bilmirəm və ya başa düşmək istəmirəm”, – deyə Zelenski vurğulayıb.

Ukrayna Prezidentinin sözlərinə görə, Qərbin Ukraynanı silahlarla təmin etməkdə tərəddüd etməsi yalnız əlavə ölümlərlə nəticələnib.

Volodimir Zelenski sözügedən müsahibədə ABŞ-nin keçmiş prezidenti Donald Trampa da müraciət edib: “Donald, mən səni Ukraynaya dəvət edirəm. Əgər həqiqətən də sən müharibəni 24 saat ərzində sonlandıra bilirsənsə, düşünürəm ki, mütləq ölkəmizə gəlməlisən”.