Onların regiondakı dayaqlarını belə məhv edirik! | Netanyahudan sərt açıqlama

“Biz HƏMAS-a qalib gəlməyə çalışırıq. Bu istiqamətdə İranın regiondakı dayaqlarını məhv edirik. Buraya Livandakı “Hizbullah”, Suriyada Bəşər Əsəd rejiminin süqutu da aiddir. Hazırda isə HƏMAS ilə yanaşı, husilərdən gələ biləcək təhdidlərin qarşısını alırıq. Qəzzada başlayan elə Qəzzada qutarmalıdır”.

Bu sözləri İsrailin Baş naziri Benyamin Netanyahu söyləyib.

İsrail Ordusundan isə bildirilib ki, müharibə qətiyyətli qələbəyə qədər davam edəcək. İsraildə ehtiyatda olan 40 min hərbi qulluqçu orduya çağırılıb.

Fələstinin yaydığı məlumata görə, yeni aviazərbələr nəticəsində Qəzza zolağında azı 100 nəfər ölüb. Hazırda isə İsrail Qəzza zolağının 75 faizinə nəzarət edir.

Qeyd edək ki, savaş 2023-cü ilin oktyabrın 7-də HƏMAS-ın hücumu ilə başlayıb. 1200 nəfər ölüb, 251 israilli girov götürülüb. 20 girovun həyatda olması barədə məlumat var. İsrailin cavab hücumları nəticəsində isə indiyədək Qəzza zolağında 62 mindən çox fələstinli öldürülüb.