Paris İranda saxlanılan iki fransalı diplomatla bağlı Tehrana etiraz edib - Baku TV

Fransanın xarici işlər naziri Jan-Noel Barro İranda saxlanılan Fransa səfirliyinin iki əməkdaşının ölkənin təhlükəsizlik qüvvələri tərəfindən son dərəcə ciddi hədə-qorxu aktına məruz qaldığını açıqlayıb.

Nazirin sözlərinə görə, diplomatlar heç bir əsas göstərilmədən bir neçə saat saxlanılıb və dindiriliblər.

Jan-Noel Barro bildirib ki, saxlanılan əməkdaşlardan biri fiziki zorakılığa da məruz qalıb. Onun sözlərinə görə, diplomatlar sərbəst buraxıldıqdan sonra Fransa səfirliyinə qayıdıblar və yaxın günlərdə İranı tərk edəcəklər.

Fransanın xarici işlər naziri baş verənləri diplomatik toxunulmazlığın kobud şəkildə pozulması və qəbuledilməz müdaxilə kimi qiymətləndirib.

O vurğulayıb ki, Paris İran vətəndaş cəmiyyətinə dəstəyini davam etdirəcək.

Qeyd edək ki, Fransa səfirliyinin iki əməkdaşı İranın kəşfiyyat xidmətləri tərəfindən dindirilmək üçün saxlanılıb. Hadisənin 19 iyul axşamı baş verdiyi bildirilir.