İsrailin zərbələri nəticəsində ölənlərin sayı artıb

Fransanın xarici işlər naziri Jan-Noel Barrot İsrailə Livana endirdiyi zərbələrlə bağlı xəbərdarlıq edib.

Nazir bildirib ki, Paris regionda gərginliyin daha da artmasının qarşısını almağa və vəziyyəti diplomatik yollarla həll etməyə çalışır.

Onun sözlərinə görə təhlükəsizliyi gücləndirmək məqsədilə Livana zirehli texnikanın göndərilməsi planlaşdırılır. Bu həm də "Hizbullah"ın tərksilah edilməsi məqsədi daşıyır.

Nazir qeyd edib ki, Fransa hökuməti eyni zamanda münaqişə nəticəsində evlərini tərk etmək məcburiyyətində qalan minlərlə insana humanitar yardım göndərmək qərarı verib.

Həmçinin Yaxın Şərqdə vəziyyətin pisləşməsi səbəbilə Fransa vətəndaşlarının təxliyəsinin də çətinləşdiyini bildirən nazir əlavə edib ki, hazırda təxminən 5000 Fransa vətəndaşı regionu tərk etmək istəyir.

Misir, Oman və BƏƏ-dən artıq dörd reys həyata keçirilib, daha üç çarter uçuşunun təşkili planlaşdırılır.

Qeyd edək ki, martın 5-də İsrailin Livana endirdiyi zərbələr nəticəsində azı 102 nəfər ölüb, 638 nəfər isə yaralanıb.