Parisdə polis zorakılığı can aldı

Görüntülər Hollivud filmlərini xatırlatsa da, əslində Fransanın paytaxtı Parisdə qeydə alınıb.

Polislə toqquşma yaşayan vətəndaşların qəzəbi elə güc strukturlarınadır. İyunun 27-də Nanterredə polisin tələblərini yerinə yetirməkdən imtina edən 17 yaşlı oğlan polis tərəfindən güllələndikdən sonra sosial şəbəkələrdə hüquq-mühafizə orqanlarının əməkdaşlarına etiraz çağırışları səslənməyə başlayıb.

Siyasi şərhçi Turab Rzayev mövzuya münasibət bildirərkən deyib ki, Fransada miqrantlara qarşı ayrı-seçkilik ilk dəfə deyil: “Fransada miqrantlara qarşı ayrı-seçkilik yeni bir hal deyil. Bu, onilliklər boyu davam edir. Bütün bunlar fransız cəmiyyətində şovinizmin nə qədər yüksək dərəcədə olduğunu göstərir. Hər il Fransada bir neçə dəfə kütləvi şəkildə maşınların yandırılması, zibil yeşiklərinin dağıdılması ilə baş verən iğtişaşlar olur. Çünki artıq miqrantlara qarşı ayrı-seçkilik istər-istəməz qarşı tərəfdə aqressiyaya səbəb olur”.

Məlumata görə, artıq nümayiş iştirakçılarından 24 nəfər həbs edilib. Emmanuel Makron hakimiyyəti gəncin ailəsindən üzrxahlıq etsə də, bu, etirazçıları sakitləşdirmək üçün kifayət etmir. İğtişaşlar digər şəhərətrafı ərazilərə də yayılıb.

“Fransanın bu prosesə qarşı daha aktiv davranması lazımdır. Fransa açıq şəkildə bu şəxsləri cəmiyyətə inteqrasiya etməyin yolunu tapmalı və bunun üçün də həmin şəxslərə bərabər imkanlar təşkil edilməlidir. Onların olduğu bölgələrdə bələdiyyələr xidmət göstərməli, Fransanın bütün vətəndaşları kimi onlar da dövlətin təqdim etdiyi imkanlardan istifadə etməlidirlər. Həmin şəxslərə təhsil və dövlət vəzifələri əlçatan olmalıdır”, – deyə T.Rzayev əlavə edib.