Paşinyan hökumət iclasında Ermənistan yollarını pislədi

“Hökumət xərclədiyi pullara münasibətini dəyişməlidir. 2017-ci il parlamentə seçki kampaniyası zamanı yolun pis vəziyyətinə görə Geqarkunikdə qəzaya düşdük. Sükan arxasında mən idim".

Bunu Ermənistanın Baş naziri Nikol Paşinyan avqustun 11-də hökumətin iclasında deyib. O, ölkə ərazisində yol infrastrukturunun bərbad vəziyyətdə olduğunu bildirib.

“Xidmət göstərən şirkətlər yolları təmizləməli, yol nişanlarını dəyişdirməli və yeniləməlidir. Vətəndaşları belə hallarda həmin şirkətləri məhkəməyə verməyə çağırıram”, – deyən N.Paşinyanın sözlərinə görə, Ərazi İdarəetmə və İnfrastruktur Nazirliyi də işini lazımi səviyyədə görmür.

Baş nazir bildirib ki, ölkənin bir sıra problemlərinin olduğu bölgələrə tez-tez səfər edir və onu narahat edən məsələlər var. Onun sözlərinə görə, Nazirlər Kabinetinin iclaslarında bu məsələlər qaldırılmır.