Paşinyan "Facebook" hesabında xarici siyasətindən nələr yazdı?

Ermənistanın Baş naziri Nikol Paşinyan yenə öz “Facebook” hesabını “vacib işlər” gördüyünü nümayiş etdirmək üçün tribunaya çevirib.

O, öz sosial şəbəkə hesabında “Ermənistan Respublikasının balanslaşdırılmış xarici siyasətinin kulminasiya nöqtəsinə çatmaq astanasında” olduğunu yazıb.

Paşinyan qonşu dövlətlərlə, eləcə də dünyanın böyük dövlətləri ilə əlaqələrini inkişaf etdirdiyindən, Ermənistanın İranla indi daha sıx təmasda olduğundan, bunun da hər iki ölkə arasında siyasi sabitliyə yol açdığından bəhs edib.

Həmçinin Gürcüstanla da yaxşı münasibətdə olduğunu dilə gətirən Paşinyan Türkiyə ilə də qarşılıqlı anlaşmanın formalaşdığına eyham vurub.

Azərbaycanla münasibətlərə gəlincə isə Ermənistanın Baş naziri yazır: “Ermənistan Respublikası bütün məsələlərə konstruktiv həll yolları təklif edib. Bu, regionda eskalasiyanı təhrik edə biləcək bütün cəhdlərin uğursuzluğa düçar olmasına gətirib çıxardı”.

Baş nazir Rusiya ilə olan münasibətlərindən söz açaraq qeyd edib ki, rəsmi İrəvan ilə Moskva arasında vəziyyət həmişəkindən daha praktikdir. İndi biz emosional deyil, diqqətimizi konkret məsələlərə yönəltmişik. Bu münasibətləri qarşılıqlı faydalı əməkdaşlıq və suverenlik əsasında inkişaf etdirməyə çalışırıq.

Sonda o, Ermənistanın Fransa, Avropa İttifaqı, Hindistan və Çinlə olan yaxşı münasibətlərindən yazıb.