Paşinyanın bu qərarı Ermənistan parlamentində etirazla qarşılandı

Ermənistan hökuməti 200 hərbçisindən vaz keçib.

Bunu ölkə parlamentinin İnsan hüquqlarının müdafiəsi daimi komissiyasının sədri, bitərəf deputat Taquhi Tovmasyan deyib. Deputat Baş nazir Nikol Paşinyanın yanvarın 11-də keçirdiyi mətbuat konfransında 44 günlük müharibədə itkin düşən hərbçilərlə bağlı açıqlamasını tənqid edib.

Paşinyan açıqlamasında bildirib ki, 2022-ci ilin sentyabrında baş vermiş döyüşlərdə və 2020-ci ilin 44 günlük müharibəsi nəticəsində itkin düşmüş hesab edilən şəxslərin tapılması istiqamətində əməliyyat-axtarış tədbirləri davam etdirilir. Tovmasyan isə bunu təkzib edərək bildirib ki, Paşinyanın belə vacib məsələ ilə bağlı məlumatlara malik olmamasına və ya problemlə guya məşğul olduğunu iddia etməsinə görə təəssüflənir.

“Faktiki olaraq 44 günlük müharibə nəticəsində itkin düşmüş hesab edilən 200-ə yaxın şəxsin axtarışları 2022-ci ilin yanvarından dayandırılıb. Mən bu məsələni Beynəlxalq Qızıl Xaç Komitəsinin nümayəndələri ilə dəfələrlə müzakirə etmişəm, həmçinin dünyanın insan haqları məsələləri ilə məşğul olan müxtəlif strukturlarına və mərkəzlərinə onlarla müraciət göndərmişəm. Hələlik heç bir müsbət dəyişiklik yoxdur”, - deyə erməni deputat qeyd edib.