Paşinyanın Putindən istəkləri nələr oldu? | Markovdan qalmaqallı açıqlama

“Ermənistan Baş naziri Nikol Paşinyanın Moskvaya səfəri və Vladimir Putinlə görüşü ona bir neçə məqsədini eyni anda reallaşdırmağa imkan verən çox hiyləgər bir plan idi”.

Bunu rusiyalı politoloq Sergey Markov deyib.

Bildirib ki, hökumət rəhbərinin burada ən vacib məqsədi isə Ermənistanın Qərbə üz tutmasından və Rusiyadan uzaqlaşmasından narahat olan Kreml rəhbərliyini sakitləşdirmək olub:

“Nikol Paşinyan istəyir ki, Rusiya hakimiyyəti Ermənistan uğrunda Qərblə danışıqlar aparsın. Digər tərəfdən də o, uzun zaman sonra ölkələr arasında yaşanan xoşagəlməz məsələlərin ardından Vladimir Putinin onunla necə davranacağını anlamaq istəyirdi. O, əmin olmaq istəyirdi ki, Rusiya Prezidenti N.Paşinyanı özlərinə daha yaxın olan biri ilə əvəzləmək istəyir, ya yox? V.Putin bu planın reallaşmasında nə qədər maraqlıdır?

Üçüncü səbəb isə ondan ibarət idi ki, Ermənistan rəsmisi Qərbə siqnal ötürmək istəyirdi. Əgər Ermənistan üçün nə isə edəcəksinizsə, tez bir zamanda edin. Əks halda, biz Rusiya ilə yaxşı münasibətlərimizi geri qaytarıb və buna uyğun hərəkət etməli olacayıq.

Biz bilirik ki, N.Paşinyan Rusiya ilə münasibətləri bitirmək istəyir, ermənilərin əksəriyyəti isə buna qarşıdırlar. Görüşün əsas səbəblərindən biri də etiraz edənləri sakitləşdirmək idi. Çünki sadə insanlar bilirlər ki, uzun illər boyu Ermənistana kömək edən, onun yanında olan elə Rusiya olub”.

Politoloq sonda onu da deyib ki, Ermənistan Rusiyadan tam olaraq qoparsa, Qərb söz verdiyi kimi, ermənilərə köməklik etməyəcək və onlar bütün problemləri, rəqibləri ilə üz-üzə qalacaqlar. Onun sözlərinə görə, Nikol Paşinyan mayın 8-i baş tutan görüşlə bəzi insanlara bildirib ki, narahat olmayın, biz Qərbə yaxınlaşsaq da, Rusiya ilə əlaqələrimizi tam kəsmirik.