Paşinyanın yeni klipi erməniləri özündən çıxardı

Ermənistanın Baş naziri Nikol Paşinyan bir daha özünü “obyektiv qarşısında” sınayıb.

Bu dəfə o, İrəvan küçələrində gəzərkən çəkilən yeni video ilə gündəmə gəlib.

N.Paşinyan sosial şəbəkələrdə paylaşdığı videoda şəhər mərkəzində piyada gəzir, mağazalardan birində özünə şlyapa seçir, insanlarla şəkil çəkdirir və bu anların hamısı peşəkar şəkildə lentə alınır.

Məlumata görə, jurnalistlik keçmişinə görə N.Paşinyan hər zaman kameranı sevir. O demək olar ki, həyatının bütün anlarını videoya çəkdirir, istər yemək bişirərkən, istər velosiped sürərkən, istərsə də Paris, Strasburq, yaxud Amerika Birləşmiş Ştatlarına səfərlərində küçələrdə gəzərkən.

Bu dəfə isə onun yanında artıq peşəkar çəkim komandası fəaliyyət göstərir. Videolar montajdan keçirilərək qısa, ritmik kliplər şəklində ictimaiyyətə təqdim olunur.

Xəbərə görə, bu tip videolar N.Paşinyanın 2026-cı ildə keçiriləcək parlament seçkilərinə yönələn uzunmüddətli kampaniyasının bir hissəsidir. Baş nazir sadə və səmimi obraz yaratmaq, xalqla eyni səviyyədə görünmək strategiyasını gücləndirir.

Digər tərəfdən bu kampaniya hökumətin son aylarda azalan reytinqini bərpa etməyə hesablanan “yumşaq PR” kimi də dəyərləndirilir.

Kadrlarda N.Paşinyan paytaxt küçələrində və yerli mağazalarda gəzərək insanlarla salamlaşır, jest və mimikaları ilə xalqa yaxın lider obrazını canlandırır.

Sosial şəbəkələrdə isə bu görüntülər birmənalı qarşılanmayıb. Bəziləri bunu N.Paşinyanın təbliğat bacarığı kimi dəyərləndirir, digərləri isə iqtisadi böhran fonunda bu videoları “siyasi şou” adlandırır.