Pentaqondan xəbərdarlıq | Ukraynanın məğlubiyyəti müharibəyə səbəb ola bilər

“Ukraynanın məğlubiyyəti Rusiya və NATO arasında birbaşa hərbi toqquşma yarada bilər”.

Bu barədə ABŞ-nin müdafiə naziri Lloyd Ostin deyib. Onun fikrincə, Ukrayna məğlub olarsa, Rusiya rəhbərliyi dayanmayacaq.

“Açığı, Ukrayna uduzsa, mən əminəm ki, NATO Rusiya ilə müharibəyə gedəcək”, – deyə ABŞ müdafiə naziri bildirib.

Bu arada, Pentaqonda həm də etiraf edirlər ki, Rusiya bütün dünyada ən böyük və ən müxtəlif nüvə arsenalına malikdir. Bunu ABŞ Silahlı Qüvvələrinin Strateji Komandanlığının rəhbəri general Entoni Kotton deyib.

Onun sözlərinə görə, bu qənaətə gəlməyinə səbəb 2023-cü il Rusiya Ordusunun RS-28 Sarmat qitələrarası ballistik raketi arsenalına qəbul etməsi olub.

Bundan əlavə, Rusiya qanadlı raketləri daşıyan nüvə sualtı qayıqlarını yaratmağa və qəbul etməyə davam edir. O, öz nüvə potensialını müasirləşdirir və genişləndirir.

Pentaqon rəsmisi əlavə edib ki, Rusiyanın nüvə arsenalına müxtəliflik və çeviklik əlavə edən Kinjal və Zirkon hipersəs raket sistemləri də daxildir.