Pentaqonun Rusiyanı özündən çıxaran planı nədir?

“Pentaqonun Almaniyada uzaqmənzilli raketlər yerləşdirmək planlarına Rusiya hərbi cavab tədbirləri hazırlayacaq”.

Bunu Rusiya xarici işlər nazirinin müavini Sergey Ryabkov deyib.

Bildirib ki, bu plan Rusiyanın təhlükəsizliyinə zərər vurmaq məqsədi daşıyır.

S.Ryabkovun sözlərinə görə, uzaqmənzilli raketlərin yerləşdirilməsi barədə qərar sadəcə eskalasiya kursunun həlqəsidir, eyni zamanda NATO və ABŞ-nin Rusiya istiqamətində xəttinin əsas komponenti olan hədə-qorxu elementlərindən biridir.

Bu arada Rusiyanın Vaşinqtondakı səfiri Anatoli Antonov da sözügedən məsələyə münasibət bildirərək ABŞ-nin planını böyük səhv adlandırıb. Diplomat bəyan edib ki, Ağ Evin Almaniyaya orta və yaxın mənzilli raketlər yerləşdirmək qərarı beynəlxalq təhlükəsizliyə birbaşa təhdiddir və silahlanma yarışı riskini artırır.

“Kremlin təxribatlara qarşı səbri hədsiz deyil. Almanlar başa düşmürlər ki, ABŞ-nin Almaniya ərazisindəki raket potensialı bu obyektlərin Rusiyanın hədəfində olacağı deməkdir? Bu təhdid deyil, normal insanın sadə məntiqidir”, – deyə səfir bildirib.

Qeyd edək ki, Pentaqon 2026-cı ildə ABŞ-nin Almaniyada artıq Avropada olan silahları əhəmiyyətli dərəcədə üstələyən uzaqmənzilli zərbə sistemləri yerləşdirməyə başlayacağını açıqlayıb.