Pezeşkian ölkədə iqtisadi vəziyyətin onu ciddi şəkildə narahat etdiyini açıqladı - Baku TV

İran Prezidenti Məsud Pezeşkian jurnalistlərlə keçirdiyi mətbuat konfransında ölkədəki iqtisadi vəziyyəti ən ciddi narahatlıq mənbəyi kimi dəyərləndirib.

Pezeşkian bildirib ki, müharibə və sülh arasında qalan indiki şəraitdə onun əsas narahatlığı ABŞ-nin yenidən hücum edib-etməməsi deyil, əksinə, xalqın dolanışığı və iqtisadi vəziyyətidir. O, İran xalqının müqavimətinə və Silahlı Qüvvələrin imkanlarına inandığını vurğulayıb.

İran Prezidenti qeyd edib ki, ABŞ, İsrail və onların analitikləri artıq bilirlər ki, bir ölkəni müharibə və raketlərlə təslimə məcbur etmək mümkün deyil.

Onun sözlərinə görə, bunu daxili ixtilaf, parçalanma və qarşıdurma yaratmaqla etmək olar.

O həmçinin əlavə edib ki, İran ilə ABŞ arasında razılaşmanın əldə edilməsi üçün fürsət yaranıb.

"Bəzən razılaşma əldə etməyin zəruriliyi barədə danışırlar və mən hesab edirəm ki, indi bunun üçün ən yaxşı vaxtdır, çünki ölkədə həmrəylik, güc və birlik müşahidə olunur", – deyə o qeyd edib.

Pezeşkianın fikrincə, İran müharibədə qalib tərəf kimi qəbul olunur.