Pezeşkiandan ABŞ-yə mesaj | Nüvə danışıqlarının 4-cü raundu necə nəticələndi?

“İran və ABŞ arasında Tehranın nüvə proqramı ilə bağlı danışıqların dördüncü raundu daha ciddi atmosferdə keçib. İran məsləhətləşmələri müsbət qiymətləndirir”.

Bu barədə İran xarici işlər naziri Abbas Əraqçi ABŞ ilə Maskatda keçirilən məsləhətləşmələrin yekunu ilə bağlı İranın dövlət televiziyasına açıqlamasında bildirib.

“Dördüncü danışıqlar raundu əvvəlki üç raundla müqayisədə daha ciddi və səmimi keçib”, ‒ deyə o bildirib.

A.Əraqçi qeyd edib ki, tərəflərin mövqeləri bir-birinə yaxınlaşıb və bu raundu irəliləyiş kimi qiymətləndirmək olar. İran İslam Respublikasının Prezidenti Məsud Pezeşkian isə qeyd edib ki, İran dinc nüvə enerjisini inkişaf etdirmək istəyini təsdiqləmək üçün ABŞ ilə dolayı danışıqlar aparır və heç vaxt öz hüquqlarından əl çəkməyəcək.

“Biz müharibəyə can atmadığımızı sübut etmək üçün danışıqlar aparırıq. İran heç vaxt nüvə silahına sahib olmaq istəməyib və çalışmayacaq, lakin heç vaxt dinc nüvə enerjisindən imtina etməyəcək”, ‒ deyə o qeyd edib.