PKK-nın İran qanadından Öcalanın çağırışına reaksiya | “Özünü burax” mesajından sonra...

PKK terror təşkilatının lideri Abdullah Öcalanın çağırışından sonra təşkilatın müxtəlif qanadlarından açıqlamalar gəlməkdə davam edir.

PKK-nın İran qanadı PJAK da çağırışı dəstəklədiyini açıqlayıb.

Təşkilatın Suriyadakı siyasi qanadı PYD-nin sədri Saleh Müslüm növbəti dəfə çağırışa dəstəyini bildirib:

“Abdullah Öcalanın açıqlamaları ilə razıyıq. Siyasi qrup olaraq fəaliyyət göstərməyimizə icazə verilsə, silahlarımızı yerə qoyacağıq”.

“Çətir”ini YPG-nin təşkil etdiyi “Suriya Demokratik Qüvvələri”nin (SDQ) lideri Mazlum Abdi çağırışın onlara aid olmadığını deyib.

A.Öcalandan PKK-ya verilən “özünü burax” mesajından sonra bütün gözlər atılacaq addımlara çevrilib.

PKK-ya bağlı Xalqların Birliyi və Demokratiya Partiyasının (DEM) millət vəkili Sırrı Süreyya Öndər bu barədə bildirib:

“Birinci mərhələ uğurla başa çatıb. Bu, dəyərli, strateji, həyati, ən vacib hissə idi”.

S.S.Öndər PKK liderinin bu bəyanatı heç bir şərt daxilində vermədiyini söyləyib:

“Şərəfimlə sizi əmin edirəm ki, bu məsələdə heç bir sövdələşmə və ya şərt yoxdur. Bundan sonra nə olacaq? Prosesin bundan sonra həyata keçirilməsi üçün bir sıra texniki, infrastruktur, hüquqi-siyasi alətlərə ehtiyac var. Bunlar bu prosesin şərtləri deyil, amma zəruridir. Biz bu ölkəni parçalamayacağıq, parçalanmasına imkan verməyəcəyik”.

S.S.Öndərə PKK-ya edilən çağırışın YPG-yə aid olub-olmadığı da soruşulub:

“Prinsipcə, hər kəsi əhatə edir. Bu iradə bəyan olunub. Bunun necə həyata keçiriləcəyini birlikdə danışaq, müzakirə edək və bir yerə çataq. Əlbəttə, bura əsasən PKK daxildir. Bu, əsas orqandır, onun inşa etdiyi strukturdur. Amma YPG də A.Öcalandan ilham alaraq ortaya çıxan bir quruluşdur. Çağırış hər kəsə aiddir”.