Putin 10 gün əvvəl dedi ki... | Vuçiç təklifi niyə qəbul etmədiyini açıqladı

Serbiya Prezidenti Aleksandr Vuçiç rusiyalı həmkarı Vladimir Putinin dəvətinə "yox" deyib.

Söhbət oktyabrın 22-24-də Kazanda keçiriləcək BRICS sammitində iştirakdan gedir. Bu barədə məlumatı yerli media paylaşıb.

Qeyd olunub ki, A.Vuçiç bu qərarını həmin vaxt ölkəsinə önəmli qonaqların gələcəyi ilə əlaqələndirib:

“Həmin tarixlərdə ölkəmizin xaricdən gələn mühüm qonaqları olacaq. Mən Prezident V.Putindən təxminən 10 gün əvvəl BRICS sammitinə qoşulmaq üçün dəvət aldım. Lakin əfsuslar olsun ki, bu beynəlxalq tədbirdə iştirak edə bilməyəcəyəm. Buna baxmayaraq, BRICS-ə və Prezident V.Putinə dəvətə görə minnətdaram”.

Xatırladaq ki, təməli 2009-cu ildə Braziliya, Rusiya, Hindistan, Çin və Cənubi Afrika tərəfindən qoyulmuş BRICS dünyada iqtisadi tarazlıq yaratmaq məqsədi daşıyır. Ölkələr qrupu bu ilin əvvəlində Misir, Efiopiya, İran və Birləşmiş Ərəb Əmirliklərini əhatə etməklə genişlənib.