Putin niyə gəlmir? - Zelenski kritik Ankara görüşü barədə nəyi etiraf etdi?

“Türkiyə Prezidenti Rəcəb Tayyib Ərdoğanla Ukraynada ədalətli sülhün necə təmin ediləcəyinin müzakirəsi nəzərdə tutulub. Türkiyə Prezidenti ilə yaxşı münasibətlərim var. ABŞ-dən də bu mövzuda müsbət siqnallar alırıq. Gözləyək, görək nə baş verəcək”.

Bu sözləri Ukrayna Prezidenti Volodimir Zelenski söyləyib.

Qeyd edək ki, Rusiyanın nümayəndə heyəti Türkiyədəki danışıqlara qatılmayacaq. Bu barədə Kremlin sözçüsü Dmitri Peskov məlumat yayıb.

ABŞ və Rusiya rəsmilərinə istinadən edən “Axios”un məlumatına görə, Tramp administrasiyası Ukraynada müharibənin dayandırılması məqsədilə Rusiya ilə məsləhətləşmələr çərçivəsində yeni və gizli plan üzərində çalışır. 28 bəndlik yol xəritəsi hazırlanır və bu, ABŞ Prezidenti Donald Trampın Qəzzada atəşkəslə bağlı irəli sürdüyü plan əsasında formalaşdırılıb. Sənəd “Ukraynada sülhün əldə edilməsi, təhlükəsizlik təminatları, Avropada təhlükəsizlik və Ağ Evin Moskva və Kiyevlə gələcək münasibətləri” kimi istiqamətləri əhatə edir.

Ukrayna ilə bağlı sülh planı hazırlanan vaxt müharibə davam edir və Rusiya Xarkovu hava zərbələrinə məruz qoyub. Dron və raket hücumu nəticəsində partlayışlar baş verib, onlarla insan yaralanıb.

Ukrayna Silahlı Qüvvələrinin Baş Qərargahından isə bildirilib ki, son sutka ərzində Rusiyanın daha 850 hərbçisi zərərsizləşdirilib.