Putin orduya "İrəli!" əmri verdi | Ukraynada faciəvi gecə

Rusiya Ordusunun Kiyev şəhərinə raket və PUA-larla hücumundan sonra ölənlərin sayı 23-ə çatıb. Axtarış-xilasetmə işləri davam etidirilir, ölü sayının artacağı istisna olunmur.

Kiyev şəhər hərbi administrasiyasının rəhbəri Timur Tkaçenko bildirib ki, 225 yaşayış binası zədələnib. Şəhərin bütün rayonlarında dağıntılar qeydə alınıb. 800 nəfər və 162 texnika fəsadların aradan qaldırılması işlərinə cəlb olunub.

Darnitsk rayonunda axtarışlar davam etdirilir. Həlak olanlardan 4-ü uşaqdır.

Ukrayna Prezidenti Volodimir Zelenski Rusiyanın hücumundan sonra Polşa, Litva, Latviya, Estoniya və Danimarka liderləri ilə onlayn görüş keçirib. Əsas müzakirə mövzusu Ukraynanın təhlükəsizlik zəmanətləri və Rusiyaya təzyiqlərin artırılması olub.

“Rusiya qətlləri dayandırmaqdan imtina edib. Onlar bununla bağlı hətta ABŞ Prezidenti Donald Trampın təklifinə “yox” cavabı veriblər. Liderlərin sammiti ilə bağlı Moskvadan yalnız neqativ siqnallar alırıq. Düşünürük ki, Putin hələ də müharibənin davam etdirilməsində maraqlıdır”, ‒ deyə Zelenski bildirib.

ABŞ və Avropanın Ukraynanın təhlükəsizliyinin qarantı ola biləcəkləri də vurğulanıb.