Putin və Tramp arasındakı zəng sübut etdi ki... | Medvedevdən qalmaqallı paylaşım

Rusiya Təhlükəsizlik Şurasının sədr müavini Dmitri Medvedev Rusiya və ABŞ prezidentləri Vladimir Putin və Donald Tramp arasında Ukrayna üzrə danışıqları nahar süfrəsi ilə müqayisə edərək söhbətin nəticələrini şərh edib.

D.Medvedev bununla bağlı məlumatı “X” sosial şəbəkəsində paylaşıb.

“V.Putin və D.Tramp arasında telefon danışığı məlum ideyanı sübut etdi – masa arxasında yalnız Rusiya və Amerika var. Menyuda yüngül qəlyanaltılar – Brüssel kələmi, Britaniya balığı, çipsləri və Paris xoruzu var. Əsas yemək isə Kiyev kotletidir. Nuş olsun!”, − deyə D.Medvedev paylaşımında bildirib.

Rusiya Təhlükəsizlik Şurasının sədr müavini bununla da Ukrayna Prezidenti Volodimir Zelenskinin “Kiyev rejimi menyuda yer alacaq salat və ya kompot deyil” bəyanatına cavab verib.

Qeyd edək ki, martın 18-də Vladimir Putinlə Donald Tramp arasında 2 saatdan çox davam edən telefon danışığı baş tutub. Prezidentlər Ukraynadakı vəziyyəti, gərginliyin qarşısının alınması şərtlərini və bəzi beynəlxalq məsələləri müzakirə ediblər.