Putindən xalqa təcili müraciət | Rusiyadan Ukraynaya cavab atəşi

Rusiya Prezidenti Vladimir Putin xalqa müraciət edib. O, Rusiyaya qarşı Qərbin uzaqmənzilli silahlarından istifadə edildiyini açıqlayıb.

Onun sözlərinə görə, Rusiyanın Bryansk və Kursk vilayətlərindəki hərbi obyektləri Qərb raketləri ilə hücuma məruz qalıb.

V.Putin qeyd edib ki, Qərb raketlərinin ölkəsinə hücumundan sonra Ukraynada münaqişə qlobal xarakter alıb. O, Rusiya Silahlı Qüvvələrinin ABŞ və Britaniya silahlarının Rusiyaya hücumlarına cavab olaraq Ukraynanın müdafiə sənayesi obyektlərinə zərbələr endirdiyini söyləyib.

V.Putin əsasən Ukraynaya uzaqmənzilli raketlərlə ölkəsinin dərinliklərinə zərbə endirilməsi və Rusiyanın ilk dəfə qitələrarası ballistik raketlərdən istifadəsi istiqamətində danışıb.

Onun əsas tezisləri bunlardır: Rusiya eskalasiyaya qəti və güzgü effekti ilə cavab verəcək. Rusiyanın istifadə etdiyi raket “Oreşnik” adlanır. Hazırda adıçəkilən raketlərin qarşısını almaq mümkün deyil. Rusiya əvvəlcədən ukraynalı mülki şəxslərə raketlərdən istifadə edildikdə təhlükə zonasını tərk etməyi təklif edəcək.