Putini müharibəyə cəlb edən məqamlar | Onlar Ukraynadakı dostlarımı qurban verirlər…

“Putini müharibəyə alman qorxusu və təmkinindən daha çox sövq edən heç nə yoxdur”.

Bu sözlər Ukraynanın Almaniyadakı səfiri Aleksey Makeyevin Almaniyada keçirilən seçkilərin iştirakçıları qarşısında çıxışında səslənib.

Ukraynalı diplomat mitinq iştirakçılarına “Alman demokratiyasının ultrasağ düşmənləri”ni xatırladıb.

“Ukrayna ərazilərini qurban verməyə hazır olan bu psevdopasifistlər şəxsən məni, mənim ailəmi, Ukraynadakı dostlarımı qurban verirlər. Onlar eyni şəkildə öz seçicilərini qurban verəcəklər. Müharibə qorxusu ilə seçiciləri qorxutmaq yanlışdır. Bu, Putinə daha çox sərf edir və onu savaşı davam etməyə şirnikləndirir”, – deyə ukraynalı səfir bildirib.

Makeyevin fikrincə, Putin Ukraynaya qarşı aparılan savaşın “ABŞ-nin Rusiya Federasiyasına qarşı müharibəsi” kimi qəbul olunmasını istəyir. Bundan başqa Kreml əsassız yerə Avropa dövlətlərini nüvə müharibəsi ilə qorxudur.

“Bütün bunlar yalandır, Almaniya Ukraynaya Leopard tankları və “Marder” piyada döyüş maşınları verərkən belə nüvə silahından istifadə olunmadı. Belə bir “rus ruleti” Kremlin özü üçün intihar sayılır”, – deyə ukraynalı diplomat vurğulayıb.