Qadınlar və uşaqlar qışqıra-qışqıra qaçırdı... | Livandan İsrailə raket zərbələri

Noyabrın 1-dən 2-nə keçən gecə Livan ərazisindən İsrailin Şaron bölgəsindəki yaşayış məntəqələrinə üç raket atılıb.

Hadisə nəticəsində 14 nəfər yaralanıb, bir neçə yaşayış binasına və avtomobillərə ciddi ziyan dəyib.

“Baş verənlər haqqında danışmaq mümkün deyil, dəhşətli hadisədir. Raket hücumuna məruz qaldıq, yüksək səs gəldikdən sonra ilk olaraq uşaqlarımın yanına getdim. Onların yaxşı olduğuna əmin oldum, daha sonra çölə çıxdıq. Küçədə uşaqlar, qadınlar qorxu içində qışqıra-qışqıra qaçırdılar. Bir müddət sonra yenidən siren səslərini eşitdik, uşaqları götürüb sığınacağa getməyə başladıq”, – deyə şəhər sakini bildirib.

İsrail Müdafiə Qüvvələrindən bildirilib ki, ölkənin mərkəzindəki bir neçə bölgədə həyəcan siqnalı işə düşüb. İsrail Ordusu Livan ərazisindən ölkəyə doğru üç raket atıldığını, ikisinin havada məhv edildiyini, bir raketin isə İsrail ərazisinə düşdüyünü açıqlayıb.