Qalmaqallı qanun layihəsini nə üçün imzaladı? | Papuaşvilidən açıqlama

“ABŞ və Avropa fondları Gürcüstanda qeyri-şəffaf maliyyələşmə ilə siyasi partiyaları və radikal qruplaşmaları maliyyələşdirir”.

Bunu Gürcüstan parlamentinin sədri Şalva Papuaşvili jurnalistlərə açıqlamasında deyib.

Spiker sanksiyalarla bağlı təhdid və bəyanatların ciddi olmadığını, xarici fondların maliyyəsi ilə bağlı şəffaflığın təmin edilməli olduğunu vurğulayıb:

“Mən ilk növbədə hər kəsi Gürcüstanda öz maliyyəsinin aşkarlığını və şəffaflığını təmin etməyə çağırıram. Təəssüf ki, bu gün Gürcüstanda qeyri-şəffaf pul xərcləyən həm Avropa, həm də Amerika fondları var və məlum olur ki, bu pullar siyasi partiyaların, radikal qrupların maliyyələşdirilməsinə sərf edilir. Ona görə də hər kəsi demokratik prinsipləri rəhbər tutmağa və öz büdcəsindən xərclənən vəsaitin şəffaflığını təmin etməyə çağırıram”.

Məlumat üçün bildirək ki, Gürcüstan parlamentinin sədri Şalva Papuaşvili iyunun 3-də “Xarici təsirin şəffaflığı haqqında” qanunu imzalayıb.

Bununla da ölkədə mübahisəli qanun layihəsi qüvvəyə minib. Parlament sədri Şalva Papuaşvili açıqlamasında bildirib ki, qanunun əsas məqsədi Gürcüstanın siyasi, iqtisadi və sosial sistemlərinin xarici müdaxilələrə qarşı dayanıqlılığını gücləndirməkdir.