Qara Dəniz bölgəsində Rusiya və Ukrayna arasında hücumlar gücləndi - Baku TV

Rusiya Ordusu Ukraynanın Odessa vilayətinə dronla hücum edib.

Bu barədə şəhər hərbi administrasiyasının rəhbəri Oleq Kiper "Telegram"da bildirib.

Onun sözlərinə görə, beş nəfər yaralanıb, onlardan ikisinin vəziyyəti ağırdır.

Ukrayna Silahlı Qüvvələri isə Sevastopolda yerləşən Rusiyanın Qara Dəniz Donanmasının Hərbi Hava Qüvvələrinin qərargahına zərbə endirib. Obyekt demək olar ki, tamamilə yanıb. Rusiya tərəfi faktı təsdiqləyib.

Qeyd edək ki, bura əsas idarəetmə mərkəzi kimi istifadə olunurdu.

Bu arada, Ukrayna Prezidenti Volodimir Zelenski ABŞ Prezidenti Donald Trampa və ABŞ Konqresinə ölkədə hava hücumundan müdafiə sistemlərinin çatışmazlığı barədə məktub göndərib. Bu barədə Prezidentin kommunikasiya məsələləri üzrə müşaviri Dmitri Litvin məlumat verib.

O həmçinin "The Economist" nəşrinin Zelenskinin guya daha 2-3 illik müharibəyə hazırlıq əmri verməsi barədə xəbərinə münasibət bildirib və bunu bunu "fake news" adlandırıb.

"Bu, saxta xəbərdir. Fraksiya ilə görüşdə Prezident noyabr ayına qədər olan dövrə diqqət yetirməli olduğumuzu söylədi, bizim bu müddətimiz var", – deyə Litvin vurğulayıb.

Ekspertlərin fikrincə, sülh danışıqları yayda başlaya bilər, amma ən böyük ehtimal budur ki, müharibə tərəflərdən biri təslim olana qədər davam edəcək.