Qarşılıqlı atışmalar daha da qızışdı | Ukraynalılar dağıntılar altında qaldı

Rusiya hava hücumundan müdafiə qüvvələri aprelin 17-dən 18-nə keçən gecə ərzində Ukraynaya məxsus 56 pilotsuz uçuş aparatını məhv edib.

Bu barədə ölkənin müdafiə qüvvələri məlumat yayıb.

Bildirilib ki, təyyarə tipli uçuş aparatlarından 27-si Voronej, 12-si Belqorod, daha 12-si Azov dənizi üzərində, 3-ü Krımda, 2-si Rostov və Krasnodarda vurulub.

Belqorod vilayətinin qubernatoru Vyaçeslav Qladkov “Telegram” kanalında məlumat verib ki, hava hücumu nəticəsində bir neçə mülki şəxs yaralanıb. Gecə ilə yanaşı, səhər saatlarında da hücum təhlükəsi xəbərdarlığı edilib. İnsanlara sığınacaqlarda qalmaları tapşırılıb.

Rusiya Silahlı Qüvvələri də gecədən səhərə qədər cavab atəşi olaraq Ukraynanın Xarkov şəhərinə ballistik raketlərlə kütləvi hücum edib. Bu barədə şəhər administrasiyasının nümayəndəsi Oleq Sinequbov məlumat verib.

Bildirilib ki, son məlumatlara görə, hücum nəticəsində 1 nəfər ölüb, 40 nəfər yaralanıb. Yaralananlar arasında 2 və 4 yaşlı uşaqlar da var. Xəstəxanaya yerləşdirilən 4 nəfərin vəziyyəti isə kritik ağırdır.

Bununla yanaşı, şəhər meri İqor Terexov bildirib ki, zərbələr nəticəsində 20 yaşayış binası, 30 fərdi ev zədələnib. Binaya düşən raket zərbəsi nəticəsində dağıntılar altında insanların olduğu ehtimal edilir.