"Qəzza təhlükəsiz olana qədər dayanmayacağıq"

İsrailin Baş naziri Benyamin Netanyahu bildirib ki, Qəzza zolağında radikal HƏMAS hərəkatı darmadağın edilmədən atəşkəsin elan olunması Fələstin anklavında “sonsuz müharibəyə” səbəb olacaq.

Netanyahu bu barədə hökumətin həftəlik iclasında bildirib və Baş nazirin sözlərini onun dəftərxanası yayıb.

“Bu gün HƏMAS-ın darmadağın olunmadan müharibənin dayandırılmasına çağıranlar təkcə HƏMAS-ın mövqeyini gücləndirmir və girovların azad edilməsini uzaqlaşdırmır, həm də 2023-cü il 7 oktyabr vəhşiliklərinin təkrar-təkrar baş verəcəyinə zəmanət verir”, – deyə Netanyahu bildirib.

“Biz yalnız HƏMAS-ın tərk-silah olunmasında israr etmirik, həm də İsrailin uzunmüddətli perspektivdə bölgənin demilitarizasiyasını təmin etməsi, silahlanma cəhdlərinə və hər hansı terrorçu qruplaşmanın yenidən təşkilatlanmasına qarşı daim fəaliyyət göstərməsində israr edirik. Girovların azad olunmasını sürətləndirmək və Qəzzanın artıq İsrail üçün təhlükə yaratmamasını təmin etmək üçün biz başladığımızı başa çatdırmalı və HƏMAS-ı darmadağın etməliyik”, – deyə Netanyahu fikrini yekunlaşdırıb və İsrailin “bu qərarı həyata keçirməkdə qətiyyətli” olduğunu bildirib.

Bu arada, İsrail tərəfi Qəzzaya humanitar yük daşıyan maşınların HƏMAS tərəfindən gizlədilməsi ilə bağlı video paylaşıb.