Qəzzada vəziyyət acınacaqlıdır, Təl-Əviv isə yasa bürünüb

Qəzza zolağında sakinlər çətin vəziyyətlə üz-üzədir. Onlar təkcə qidalanmağa saatlarla vaxt sərf edirlər. Humanitar yardımın çatdırılması da ayrıca bir problem olaraq qalır.

ABŞ-nin təşəbbüsü ilə razılaşdırılan atəşkəsdən sonra mənzərə bir qədər dəyişib. İnsanlar evlərinə geri qayıdırlar. Daha dəqiq desək, Qəzza xarabalıqlarında qurulan çadırlara.

Oktyabrın 10-dan 31-nə kimi 3203 humanitar yardım daşıyan yük avtomobili bölgəyə daxil olub. Lakin bütün bunlar hər şeyin yaxşılaşması üçün kifayət deyil. İsrail tərəfi ABŞ Prezidenti Donald Trampın planına sadiq olduğunu vurğulayıb. Eyni zamanda HƏMAS-ın ölən girovların meyitlərini geri qaytarmadığını iddia edir.

“İsrail Qəzzaya “hər gün yüzlərlə yük maşını yardım göndərir, HƏMAS isə öz xalqı üçün nəzərdə tutulan humanitar yardımın çatdırılmasına mane olmaqla əsl simasını göstərir”, – deyə məlumatda qeyd olunub.

HƏMAS da Təl-Əvivə qarşı oxşar ittihamlar səsləndirir. Qəzzadakı aclığın fonunda İsraildə 2023-cü il oktyabrın 7-də həyatını itirən şəxslərin xatirəsi yad edilib.