Qəzzada xəstəxananın yaxınlığındakı tibb anbarları hava hücumu nəticəsində dağıldı - Baku TV

İsrail Ordusu avqustun 1-i səhər saatlarında Deyr əl-Bəlahdakı Əl-Əqsa Şəhidləri Xəstəxanasının yaxınlığındakı anbarları hədəfə alıb, onlardan ikisini və içindəki vacib tibbi ləvazimatları tamamilə məhv edib. Məcburi köçkün fələstinlilərin sığındığı yaxınlıqdakı çadırlara ciddi ziyan dəyib. Onlarla çadır yanıb.

Qəzza Səhiyyə Nazirliyi İsrailin anbarlara "birbaşa və sistematik" hücumunu pisləyib.

"İstifadə edilən raketlərin dağıdıcı gücü hədəf alınan ərazidəki dörd anbardan ikisini tamamilə məhv edib və digər ikisinə ciddi ziyan vurub", – deyə Nazirlikdən açıqlama verilib.

Bəyanatda əlavə edilib ki, zərbələr həmçinin xəstəxananın bitişik ambulatoriya binasına ciddi ziyan vurub və xəstələrin həyatını xilas etməklə birbaşa əlaqəli olan vacib miqdarda tibbi ləvazimatları məhv edib.

Nazirliyin məlumatına görə, səhər tezdən baş verən hücum xəstələr, onların müşayiətçiləri və tibb işçiləri arasında geniş təşviş yaradıb.

Nazirlik beynəlxalq ictimaiyyəti, BMT-ni, insan haqları və humanitar qrupları dərhal müdaxilə etməyə, İsrail hücumlarını dayandırmağa, tibb müəssisələrini və personalı qorumağa çağırıb.