Qəzzadakı müharibə bitmək bilmir | BMT-də səsvermə yenə təxirə salındı

BMT Təhlükəsizlik Şurasında Qəzza ilə bağlı qətnamə layihəsinin səsverməsi üçüncü dəfə təxirə salınıb. Buna səbəb isə Şuranın qətnamə layihəsi ilə bağlı danışıqları davam etdirmək və diplomatiya üçün vaxt vermək qərarına gəlməsi olub.

Qeyd edək ki, qətnamə layihəsində bütün tərəflər beynəlxalq hüquqa uyğun olaraq mülki şəxslərin müdafiəsi üzrə öhdəliklərini yerinə yetirməyə çağırılır və BMT Baş Katibindən humanitar yardıma nəzarət mexanizminin yaradılması xahiş olunur.

Sənəddə həmçinin Qəzzaya yardım çatdırmaq üçün quru, dəniz və hava yollarından istifadənin asanlaşdırılması və sərhədlərin açılması, bütün girovların azad edilməsi də öz əksini tapıb və burada beynəlxalq humanitar hüququn pozulması qəti şəkildə pislənilir.

Bundan başqa, qətnamədə İsrail və HƏMAS arasında davam edən münaqişənin həllinin vacibliyi və Qəzza zolağının Fələstinin ərazisi olduğu vurğulanıb.

Kütləvi informasiya vasitələrində yayılan iddialara görə, ABŞ BMT-yə yardıma nəzarət səlahiyyətinin verilməsi hüququna qarşı çıxıb və bu səbəbdən də sənəd hələ də təsdiqlənməyib.

Bildirək ki, sözügedən sənəd layihəsi 22 dekabr tarixində yenidən səsverməyə çıxarılacaq.