Qlobal miqyasda Ebola yayılması ilə bağlı xəbərdarlıq edilir - Baku TV

Braziliyanın San-Paulu ştatının səhiyyə orqanları Ebola qızdırmasına şübhəli bilinən yoluxma halını araşdırır.

Bu barədə yerli hakimiyyət orqanları məlumat yayıb.

Qeyd olunur ki, hazırda Ebola epidemiyasının qeydə alındığı Konqo Demokratik Respublikasına səfərdən qayıdan bir şəxsdə yüksək hərarət müşahidə olunub.

Rəsmi açıqlamada bildirilib ki, pasiyent yoluxucu xəstəliklərə şübhəli və ya təsdiqlənmiş halların müşahidə altında saxlanıldığı ixtisaslaşmış xəstəxanada təcrid edilib.

Bu arada Ümumdünya Səhiyyə Təşkilatı Konqo Demokratik Respublikası və Uqandada Ebola epidemiyası ilə mübarizə üçün tələb olunan maliyyənin yalnız üçdəbirinin təmin olunduğunu açıqlayıb.

Bunu təşkilatın baş direktoru Tedros Adhanom Qebreyesus bildirib.

“Bu epidemiyanın qarşısının alınması prosesində bir çox çətinliklər mövcuddur. Vəziyyət olduqca mürəkkəbdir və tələb olunan dəstək tam şəkildə təmin edilməyib. Biz ehtiyac duyulan maliyyənin yalnız üçdəbirini əldə etmişik”, – deyə o qeyd edib.

Ümumdünya Səhiyyə Təşkilatının rəhbəri beynəlxalq ictimaiyyəti dəstəyi artırmağa çağırıb. O, xüsusilə tibb işçilərinin zəruri avadanlıq və fərdi qoruyucu vasitələrlə təmin edilməsinin vacibliyini vurğulayıb.