"Hizbullah" tərk-silah olunacaq? | Yaxın Şərqdə son vəziyyət - Baku TV

ABŞ-də keçirilən danışıqlarda İsrail və Livan tərəfləri “Hizbullah”ın tam şəkildə tərk-silah olunması barədə razılığa gəlib.

“NBC News”un ABŞ Dövlət Departamentini istinadən yaydığı məlumata görə, tərəflər həmçinin İranın Livanın gələcəyinə təsirinin məhdudlaşdırılması məsələsini də müzakirə edib.

Görüşdə ABŞ tərəfindən Livanda köçkünlərə yardım məqsədilə 58,8 milyon dollar məbləğində humanitar paket təsdiqlənib.

Rəsmi məlumatlara görə, İsrail və “Hizbullah” arasında qarşıdurma nəticəsində 1 milyondan çox livanlı məcburi köçkünə çevrilib. Bundan əlavə, tərəflər uzunmüddətli perspektivdə Livanın firavanlığının təmin edilməsi və biznes məqsədilə iki ölkənin sərhədlərini maneəsiz keçmək zərurəti barədə danışıblar.

Qeyd edək ki, bu, son 40 ildə Livan və İsrail arasında ilk birbaşa danışıqlardır.

Bu arada, İsrail Ordusunun yaydığı məlumata əsasən, Livanın cənubunda keçirilən əməliyyat zamanı “Hizbullah”ın üç üzvü əsir götürülüb. Hadisənin Bint-Cubeyl bölgəsində baş verdiyi bildirilir.

Məlumata görə, döyüşdən sonra üç nəfər silahı yerə qoyaraq İsrail hərbçilərinə təslim olub. Onlardan birinin “Radvan” xüsusi təyinatlı qüvvələrinin üzvü olduğu qeyd edilir.