"Müdafiə oluna bilməyəcəklər!" | ABŞ 7 ölkə ilə niyə təcili danışıqlar aparır? - Baku TV

“Fikrimcə, biz, əslində, İranı demək olar ki, məğlub etmişik. Düşünürəm ki, onların bir az müqavimət göstərmək imkanı qala bilər, amma çox yox. Bildiyiniz kimi, onların hava qüvvələrini, donanmalarını sıradan çıxarmışıq. Hava Hücumundan Müdafiə sistemlərini məhv etmişik, onların artıq, ümumiyyətlə, hava müdafiəsi yoxdur. Rəhbərliklərini də iki və ya üç dəfə zərərsizləşdirmişik”.

Bu sözləri ABŞ Prezidenti Donald Tramp deyib.

“Onlar danışıqlar aparmaq istəyirlər, çox istəyirlər ki, danışıqlar olsun. Amma buna hazır deyillər. Danışıqlar aparmağı çox istəyirlər və belə də olmalıdır. Məncə, indi olmasa da, nə vaxtsa danışıqlara hazır olacaqlar”, – deyə o qeyd edib.

ABŞ Prezidenti Donald Tramp həmçinin Administrasiyasının ABŞ-İsrail-İran müharibəsi fonunda Hörmüz boğazının təhlükəsizliyini təmin etmək üçün yeddi ölkə ilə danışıqlar apardığını bildirib:

“Mən bu ölkələrdən öz ərazilərini qorumalarını tələb edirəm. Çünki enerjilərini oradan alırlar və onlar gəlməli və bizə kömək etməli idilər. Siz iddia edə bilərsiniz ki, bəlkə də, biz orada ümumiyyətlə olmamalıyıq, çünki bizə ehtiyac yoxdur, çoxlu neftimiz var. Biz dünyanın hər yerində bir nömrəli istehsalçıyıq. Bunu ikiqat artırdıq. Amma biz bunu sanki vərdiş etdiyimiz üçün edirik, eyni zamanda bəzi çox yaxşı müttəfiqlərimizə görə edirik”.

D.Tramp Administrasiyasının əlaqə saxladığı yeddi hökumətin adını çəkməkdən imtina etsə də, martın 20-dək bir çox ölkənin Hörmüz boğazından gəmilərin daşınmasına icazə vermək üçün hərbi gəmilər göndərəcəyini gözlədiyini bildirib.