"Ramazanda İrana hücum etmək..." | Neft qiymətlərində kəskin artım olacaq? - Baku TV

İran ətrafında baş verən hadisələr enerji qiymətlərini yenidən aktuallaşdırır. Artıq bu proses özünü neftin qiymətində göstərməkdədir.

Belə ki, fevralın 17-dən başlayaraq “Brent” və Qərbi Texas markalı neftin qiymətində artım müşahidə olunur.

Enerji məsələləri üzrə ekspert İlham Şaban bildirir ki, ABŞ ilə İran arasında nüvə proqramı ilə bağlı razılaşma əldə edilməsə, iki ölkə arasındakı gərginlik davam edəcək və bu da qiymətlərə təsir göstərəcək:

“Heç bir tərəf öz dediyindən geri çəkilmək istəmir. Ancaq müxtəlif variantlar təklif olunur. Digər tərəfdən isə indi Ramazan ayıdır. Ramazan ayında İrana hücum etmək ABŞ ilə müsəlman ölkələri arasındakı münasibətləri daha da gərginləşdirə bilər. Ona görə bu gərginliyin ən azından bir ay davam edəcəyi proqnozlaşdırılır”.

İqtisadçı Xalid Kərimli isə hesab edir ki, neftin qiymətinin artım səviyyəsi ABŞ və İran arasındakı qarşıdurmanın davametmə müddətindən asılı olaraq iki dəfəyədək yüksələ bilər:

“Əgər müharibə başlasa, qiymətlər ən azı 15–20 % bahalaşacaq. Əgər müharibə Hörmüz boğazını da əhatə etsə, yəni Hörmüz boğazında enerji ticarəti dayansa, qiymətlər hətta iki dəfəyə qədər arta bilər. Müharibənin müddəti, yayılma arealı, Hörmüz boğazına keçib-keçməməsi və İranın reaksiyası kimi faktorlar qiymətlərin həm aşağı, həm də yuxarı istiqamətdə hərəkətinə ciddi təsir göstərəcək”.