"Rusiya-Ukrayna arasında müsbət dinamika müşahidə olunur" | Kirill Budanov - Baku TV

“Rusiya ilə Ukrayna arasındakı sülh müzakirələri artıq son mərhələyə qədəm qoyur və tərəflərin tezliklə rəsmi razılığa gələcəyi gözlənilir”.

Bunu Ukrayna Prezidenti Administrasiyasının rəhbəri Kirill Budanov “Bloomberg” nəşrinə verdiyi müsahibəsində səsləndirib.

O, rəsmi Moskva ilə aparılan sülh dialoqunda müsbət dinamikanın müşahidə olunduğunu və qısa müddət ərzində yekun müqavilənin imzalana biləcəyini diqqətə çatdırıb.

Administrasiya rəhbəri əlavə edib ki, indiyə kimi vasitəçilərin iştirakı ilə keçirilən görüşlərdə tərəflər maksimalist yanaşmalarından çıxış etsələr də, artıq yavaş-yavaş ortaq məxrəcə gəlirlər.

Bu arada, Ukrayna Silahlı Qüvvələri cəbhədən 1000 kilometr uzaqlıqda və Xəzər dənizində yerləşən Rusiya Ordusunu yanacaqla təmin edən iki qazma platformasına zərbə endirib.

Qeyd olunub ki, həmin obyektlər Rusiyanın “Lukoil” şirkətinə məxsusdur. Onların Rusiya Ordusunun yanacaq təminatında mühüm rol oynadığı vurğulanıb. Ukrayna hərbi rəhbərliyi bu cür zərbələrin davam etdiriləcəyini açıqlayıb.