"Telegram"ın yaradıcısından qalmaqallı açıqlama | Fransa ilə bağlı nələr üzə çıxdı?

“Telegram” messencerinin yaradıcısı Pavel Durov Avropa ölkələrindən birinin ondan Rumıniyada keçirilən prezident seçkiləri ərəfəsində müxalif, xüsusilə konservativ “Telegram” kanallarının susdurulmasını tələb etdiyini bildirib.

Bu barədə o, şəxsi “Telegram” kanalında paylaşım edərək məlumat verib.

P.Durov konkret ölkənin adını çəkməsə də, paylaşıma “baget” emojisini əlavə etməklə bunun Fransa ola biləcəyinə eyham vurub.

“Biz “Telegram” olaraq Rumıniyada heç bir kanalı susdurmadıq. Demokratiyanı “qorumaq” adı ilə onu pozmaq olmaz. Seçkilərə müdaxilənin qarşısını almaq bəhanəsi ilə seçkilərə müdaxilə etmək absurd bir yanaşmadır”, – deyə o qeyd edib.

P.Durov bildirib ki, ifadə azadlığı və ədalətli seçkilər bir-birindən ayrılmaz dəyərlərdir və Rumıniya xalqı həm söz azadlığına, həm də şəffaf seçkilərə layiqdir.