"Xəstəxanadan istifadə edib terror törədiblər" | İsrailli generaldan açıqlama

“Arxada gördüyünüz yer Avropa Xəstəxanasının girişidir. Qapının qarşısında böyük bir çuxur görünür. Həmin hissə HƏMAS-ın komanda və idarəetmə mərkəzinə gedən tunelin çıxış nöqtəsidir”.

Bu sözləri İsrail Müdafiə Qüvvələrinin nümayəndəsi, briqada generalı Effi Defrin deyib.

Onun sözlərinə görə, HƏMAS dəfələrlə xəstəxana kimi mülki infrastrukturlardan istifadə edərək terror fəaliyyətləri həyata keçirib.

“Əməliyyatı xəstəxanaya zərər vurmadan tamamlamaq bizim əsas nailiyyətlərimizdən biridir. Məqsəd xəstəxanaları deyil, terror infrastrukturlarını hədəf almaqdır”, – deyə o bildirib.

Generalın sözlərinə görə, bu tuneldə keçirilən əməliyyat zamanı HƏMAS-ın lideri Məhəmməd Sinvar öldürülüb. Eyni zamanda Rəfah Briqadasının rəhbəri Məhəmməd Şabane və bir neçə digər silahlı şəxs də zərərsizləşdirilib.

“İsrailin məqsədi HƏMAS-ı tamamilə sıradan çıxarmaq və təşkilatın sərhəd yaxınlığında mövcudluğuna son qoymaqdır”, – deyə briqada rəhbəri bildirib.

General tunel və ətraf ərazilərdə çoxlu sayda silah-sursat, pul və digər araşdırılması vacib materialların aşkarlandığı vurğulayıb. O, Avropa Xəstəxanasının fəaliyyətinin təhdid aradan qaldırıldıqdan sonra bərpa ediləcəyini də qeyd edib.