Rəsmi Tehrandan ABŞ-yə ittiham | Ara qarışdı, ABŞ bayraqları yandırıldı

Rəsmi Tehran Suriyanın paytaxtı Dəməşqdə yerləşən İran konsulluğuna edilən hücuma görə ABŞ-ni günahlandırıb.

Bu barədə İranın xarici işlər naziri Hüseyn Əmir Abdullahian sosial şəbəkə hesabında yazıb.

Bildirib ki, hücumla əlaqədar İsveçrənin İrandakı səfirliyinin diplomatı Xarici İşlər Nazirliyinə çağırılıb. Diplomatın vasitəsilə İran ABŞ-yə məsələdə əli olmasına dair mesaj ötürüb. ABŞ tərəfi də bütün bu ittihamlara qarşı səssiz qalmayıb.

Prezident administrasiyası rəsmi Tehrana bildirib ki, Vaşinqtonun Dəməşqdəki İran konsulluğuna hücumla bağlı əvvəlcədən xəbəri olmayıb və bu hücumla ümumiyyətlə əlaqəsi yoxdur.

Tərəflərin bir-birinə qarşı iddia qaldırmaları fonunda paytaxt Tehranda etiraz aksiyaları keçirilib. Etiraz zamanı ABŞ və İsrailin bayraqları yandırılıb.

Qeyd olunub ki, iğtişaşlar Dəməşqdəki İran konsulluğuna hücuma cavab olaraq təşkil edilib.