Rəsmi Tehranla Vaşinqton arasında danışıqlar bərpa olunacaq? - Baku TV

İranın xarici işlər naziri Abbas Əraqçi ABŞ Prezidentinin xüsusi elçisi Stiv Uitkoffa gizli şəkildə məlumat verib ki, Ali Rəhbər Müctəba Xamenei ABŞ ilə potensial razılaşma barədə danışıqları təsdiqləyib.

“Ynet” nəşri bu iddia ilə çıxış edib.

Onların məlumatına görə, yeni Ali Rəhbər İranın şərtləri qəbul ediləcəyi təqdirdə müharibəni sona çatdırmağa razıdır.

“The Guardian” isə yazır ki, Vaşinqton və Tehran arasında müharibənin dayandırılması ilə bağlı danışıqlarda ABŞ-nin nümayəndə heyətinə vitse-prezidenti Cey Di Vens rəhbərlik edə bilər. İran tərəfindən isə əsas danışıqçı kimi parlamentin spikeri Məhəmməd Baqer Qalibafın iştirakı proqnozlaşdırılır.

Yeri gəlmişkən, Pakistan ABŞ və İran arasında danışıqlara ev sahibliyi etməyə hazırdır. Bununla bağlı Baş nazir Şahbaz Şərif “X” hesabında paylaşım edib.

“Pakistan regionda və onun hüdudlarından kənarda sülh və sabitlik naminə Yaxın Şərqdəki müharibəni dayandırmaq üçün dialoqun aparılmasına yönələn səyləri alqışlayır və tam dəstəkləyir. ABŞ və İranın razılığı olduğu təqdirdə, Pakistan davam edən münaqişənin hərtərəfli həllinə nail olmaq üçün mənalı və yekun danışıqların keçirilməsinə ev sahibliyi etməyə hazırdır və bundan şərəf duyar”, – deyə Şahbaz Şərif paylaşımında bildirib.