Roberta Metsola dünyaya çağırış etdi

Avropa Parlamenti genişmiqyaslı etirazlar zamanı çoxsaylı insan tələfatı fonunda İrana qarşı sanksiyaların sərtləşdirilməsinə və İslam İnqilabı Keşikçiləri Korpusunun terror təşkilatı elan olunmasına çağırıb.

Bu barədə Avropa Parlamentinin sədri Roberta Metsola plenar iclasda bəyan edib.

“Bu, simvolik jest deyil və onların cəzasız hərəkət etmək imkanlarını daha da məhdudlaşdıracaq və maliyyə axınını pozacaq”, – deyə o bildirib.

Metsola xatırladıb ki, ötən həftə bütün siyasi qruplarla aparılan məsləhətləşmələrdən sonra İran diplomatlarının və hakimiyyət nümayəndələrinin Avropa Parlamentindən “öz qəddarlığını Avropada legitimləşdirmək” üçün istifadəsinə imkan verən hər cür qarşılıqlı əlaqəni qadağan etmək barədə qərar qəbul olunub.

Qeyd edək ki, SEPAH-ın terror təşklatı kimi tanınması mövzusunda bəzi Avropa ölkələri artıq qərar versə də, bəziləri hələ dəstək ifadə etməyib. Belə ki, İranla bağlı bir çox məsələlər kimi bu barədə də ölkələr arasında fikir ayrılığı mövcuddur.

ABŞ İslam İnqilabı Keşikçiləri Korpusunun xarici qüvvələrini terror təşkilatı kimi təsnif etsə də, SEPAH-ın bütövlükdə terror təşkilatı kimi tanınması üçün beynəlxalq konsensus yoxdur.